Psa 92 | NdeIBE | STEP | Ihubo. Ingoma. Elosuku lweSabatha. Kuhle ukudumisa uJehova lokuhlabelela ebizweni lakho, wena oPhezukonke,

Psalms 92

1 Kuhle ukudumisa uJehova lokuhlabelela ebizweni lakho, wena oPhezukonke,

2 ukumemezela uthando lwakho ekuseni lokuthembeka kwakho ebusuku,

3 ukutshaya iziginci ngomhubhe wezintambo ezilitshumi lemvungamo emnandi yechacho.

4 Ngokuba uyangijabulisa ngezenzo zakho, O Jehova; ngihlala ngentokozo ngomsebenzi wezandla zakho.

5 Mikhulu kangaka imisebenzi yakho, O Jehova, izikile imicabango yakho!

6 Umuntu ongelangqondo akazi, iziwula kazizwisisi,

7 ukuthi loba ababi bemila njengotshani lezigangi zonke ziphumelela, zizabhujiswa nini lanini.

8 Kodwa wena Jehova, uphakeme laphakade.

9 Ngokuba ngempela izitha zakho, O Jehova, ngempela izitha zakho zizabhubha; zonke izigangi zizachithizwa.

10 Uluphakamisile uphondo lwami njengolwenyathi; ngagcotshwa ngamakha amnandi.

11 Amehlo ami abonile ukwehlulwa kwezitha zami; izindlebe zami zizwile ngokuchithizwa kwezitha zami ezimbi.

12 Abalungileyo bazaqhela njengesihlahla selala, bazakhula njengomsedari waseLebhanoni;

13 ngoba behlanyelwe endlini kaJehova, bazaqhela emagumeni kaNkulunkulu wethu.

14 Bazabe belokhu bethela izithelo lanxa sebebadala, bazahlala belokhu behluma beluhlaza,

15 bememezela besithi, “UJehova uqotho; uliDwala lami, kakukho bubi kuye.”